गौरव पोखरेल
माघ १०, २०७२ मा प्रकाशित– झापा बिर्तामोडकी स्मृति ओलीलाई अहिले बधाई थाप्नै भ्याईनभ्याई छ । सम्मान लिन र साथीहरूको बधाई सन्देशको उत्तर दिन व्यस्त छिन् ।
मिस टिन झापा–२०१५ को उपाधि चुमेपछि १४ वर्षकी स्मृतिको चर्चा बढेको छ । उनी बिर्तामोडकै वाल्मीकि एजुकेसन फाउन्डेसनमा कक्षा ९ मा अध्ययन गर्दै छिन् ।
मिस नेपाल हुँदै मिस वल्र्डसम्मको उपाधि कब्जा गर्ने उनको लक्ष्य छ । नेपाली टेलिभिजन च्यानल ‘टीभी फिल्मी’ बाट प्रसारण भएको ‘को बन्छ कलाकार ?’ मा कक्षा ५ मै पढ्दा उनी सहभागी भइन् । जहाँ उनले उत्कृष्ट बाल कलाकारको ‘टाइटल’ पाइन् । शीर्ष ५ मा पुग्दै उनले यो राष्ट्रियस्तरको ‘टाइटल’ पाएकी थिइन् ।
‘आत्मविश्वास र दृढ इच्छाशक्तिले गरेर यो स्थानमा म आइपुगेकी हुँ,’ उनले भनिन् । विद्यालयमा आयोजना हुने प्रत्येक अतिरिक्त क्रियाकलापमा उनी भाग लिन्छिन् ।
मोडलिङ, नृत्य र नाटकमा निक्कै रुचि राख्ने उनी कुशल वक्ता पनि हुन् । विद्यालयमा आयोजना हुने वादविवाद प्रतियोगिता होस् या वक्तृत्वकला, सबैमा उनै शीर्षस्थानमा हुन्छिन् ।
यति मात्र नभई उनी फुटबल खेल्न पनि खप्पिस छिन् । उनी फुटबलमा अन्य केटा साथीलाई पनि ‘तह’ लगाउँछिन् । पढाइमा पनि अब्बल छिन् । सानैमा उनको प्रतिभा जो–कोहीको लागि पनि आश्चर्यको विषय बन्छ ।
उनका शिक्षक र साथीहरू उनलाई ‘इन्सपायर गर्ल’ भनी सम्बोधन गर्छन् । उनले नेपाली चलचित्र ‘सो सिम्पल’ मा बालकलाकारको रूपमा प्रतिभा प्रदर्शन गरिसकेकी छन् ।
उनी चलचित्र ‘त्यो दिन’ मा नायिकको भूमिकामा छिन् । उनले एउटा म्युजिक भिडियोमा पनि अभिनय गरिसकेकी छन् । सामाजिक सन्जाल फेसबुक र ट्वीटरमा पनि उनी निक्कै सक्रिय देखिन्छिन् ।
मिस टिन झापाको उपाधि जितेसँगै उनलाई धेरै ‘फ्रेन्ड रिक्वेस्ट’ आउन थालेका छन् । ‘फलोअर्स’ बढेका छन् । सामाजिक सन्जालमा यति धेरै ‘फलोअर्स’ देखेर उनी दङ्ग छिन् ।
उनी सामाजिक सन्जाल चलाउँदा निक्कै सचेत पनि छिन् । नचिनेको मान्छेहरूको ‘फ्रेन्ड रिक्वेस्ट’ लाई उनी स्वीकार गर्दिनन् ।
तर, धेरै ‘फ्रेन्ड रिक्वेस्ट’ आउँदा आफूलाई साँच्चै नै सेलिब्रेटी भएजस्तो लागेको उनी बताउँछिन् । नेपाली समाजले मोडलिङ, कलाकारिता क्षेत्रमा गएका नारीहरूलाई राम्रो दृष्टिकोणले हेर्दैन ।
तर, पनि उनी यही विधामा जम्न खोज्दै छिन् । आखिर किन त ? उनी भन्छिन्, ‘मोडलिङ र कलाकारितालाई नेपाली समाजले राम्रो दृष्टिले हेर्दैन । तर, म यही विधामा केही गर्न चाहन्छु ।’
Source: Ekantipur
About Unknown
No one has commented yet. Be the first!