वायोस्याण्ड फिल्टरले फेरियो दैनिकी

गौरव पोखरेल ।
झापा – झापाको दक्षिणी गाविस शरणामती–७ का सरद तिम्सिनाको दैनिकी अहिले वायोस्याण्ड फिल्टरको बारेमा जिल्लाका विभिन्न गाउँका स्थानीयलाई सचेत गराउँदैमा बित्ने गरेको छ । 

करिब ५ वर्ष विदेशमा परिश्रम गरेका उनी अहिले स्वदेशकै कमाइले सन्तुष्ट छन् । 

नयाँ ठाउँ, नौलो भाषा र अर्काको नियममा बाँधिएर काम गर्नुको दुःखदायी क्षणलाई सम्झँदै उनले भने, “अहिले आफ्नो ठाउँमा घरकै खाना खाएर परिश्रम गर्न पाउँदा निक्कै खुसी छु ।”

यता, शरणामती–६ का मोहन पोखरेलको दैनिकी पनि हिजोआज वायोस्याण्ड फिल्टरको विषयमा स्थानीयसँग छलफल गर्दैमा बित्ने गरेको छ ।

करिब ६ वर्ष विभिन्न खाडी मुलुकमा परिश्रम गरेका पोखरले आफ्नै गाउँमा खुलेको घरेलु उद्योगमा काम गर्न पाउँदा मख्ख छन् । 

“अर्काको देशमा गएर पसिना बगाउनु भन्दा आफ्नै ठाउँमा थोरै भए नि आर्जन गर्नु राम्रो रहेछ,’ उनले मुस्कुराउँदै भने ।

यी दुई युवा त प्रतिनिधि पात्र मात्र हुन् । अहिले शरणामतीका १० जनाले आफ्नो गाउँमै खुलेको घरेलु उद्योगमा काम गरेर गुजारा चलाइरहेका छन् । 

तिम्सिना र पोखरेलजस्तै अन्य युवाहरु पनि यसबाट पूर्ण सन्तुष्ट देखिन्छन् ।

यसरी सक्षम युवा शक्तिलाई स्वदेशमै परिश्रम गर्न सक्ने बाटो देखाइदिने संस्था हो – कनकाई बायोस्याण्ड फिल्टर उद्योग । 

४२ वर्षीय मोहन अहिले सोही उद्योगमा कार्यक्रम संयोजकको रुपमा काम गरिरहेका छन् भने तिम्सिना बजार व्यवस्थापकको रुपमा घरपायक उद्योगमा काम गरेर आफ्नो जिविका चलाइरहेका छन् ।

‘अब विदेश जान्नँ’

यस उद्योग सञ्चालन भए पश्चात विदेशिने सोच लिएका युवाहरु गाउँमा रोकिएका छन् । उनीहरु हाल आफ्नै ठाउँमा परिश्रम गरिरहेका छन् । 

यस उद्योगका सञ्चालक हाल सबै युवाहरुको प्रेरणाको स्रोत बनेका छन् । लामो समयसम्म विदेशिएर आएपछि यस उद्योगमा काम गर्न थालेका युवाहरु अब विदेश नजाने बताउँछन् । 

“आफ्नै गाउँमा उद्योग खोलेर अरुलाई पनि रोजगारी दिन पाउँदा निक्कै खुशी छु”, दाहालले भने, “यस उद्योगलाई अझै व्यापक बनाएर अगाडि लाने सोच छ ।”

कमिशनबाटै १ लाख कमाइ

यस उद्योगमा काम गर्नेहरुले फिल्टरको बिक्री गरेर कमिशनबाटै १ लाखसम्म पनि कमाई गर्ने गरेका छन् । 

घरमै पुर्याइदिने सुविधासमेत रहेको यस उद्योगले एक पटकमा १० वटादेखि ३० वटासम्म फिल्टरलाई उपभोक्ताको घरमा पुर्याउने गरेको छ । 

हाल उपभोक्ताहरुका लागि यस फिल्टरको मूल्य ४ हजार तोकिएको छ । यस उद्योगमार्फत महिनामा ३० वटा फिल्टर उपभोक्ता माँझ पुग्ने गरेको छ । 

गत वर्ष यस उद्योगले १२ सय वटा फिल्टर बिक्री गरेको तथ्याङ्क उद्योगसँग रहेको छ । यस वर्ष संस्थाले १५ सय वटा फिल्टर विक्री गर्ने लक्ष्य रहेको छ ।

के हो वायोस्याण्ड फिल्टर ?

हामीले खाने पानीमा हुने धमिलोपन, गन्ध, आइरन, आर्सेनिक, कुल कोलिफर्म जस्ता तत्वहरुलाई हटाउने घरेलु प्रविधि हो, बायोस्याण्ड फिल्टर । 

कङ्क्रिट, बालुवा र सिमेन्टबाट तयार गरिने यस फिल्टरलाई सन् १९९३ मा क्यानाडाका वैज्ञानिक डा. डेभिज्मेन्जले विकास गरेका हुन् । 

यसले ‘स्लो स्याण्ड फिल्ट्रेसन प्रविधि’ को सिद्धान्तमा रहेर पानीको शुद्धिकरण गर्छ ।

कसरी काम गर्छ?
वायोस्याण्ड फिल्टरमा प्रयोग हुने बालुवाका कणहरुमा जीवाणुहरु छानिन्छन् । त्यस्तै, बालुवाका कणहरुमा टाँसिएर तथा च्येप्टिएर पनि जीवाणुहरु नष्ट हुन्छन् । 

ठूला जीवाणुहरुले पानीमा रहेका अरु ससाना जीवाणुहरुलाई समेत नष्ट गर्ने प्राविधिकहरु बताउँछन् । त्यस्तै, फिल्टरमा पर्याप्त आहार र अक्सिजनको कमीले समेत जीवाणु नष्ट हुन्छन् ।
                                  - Adopted from: http://www.ratopati.com/news/14128/#sthash.70Y7tZhS.dpuf

Share on Google Plus

About Unknown